تاک
پارتی دیموکراتی گەلان (هەدەپە) ڕوو لە دەسەڵات و پشت لە بەرەی ئۆپۆزسیۆنی تورکیا دەکات.
بەگوێرەی ڕاپۆرتێکی سایتی DWی تورکی، گفتوگۆی نهێنی لە نێوان بەرپرسانی پارتی داد و گەشەپێدان (ئاکەپە) و هەدەپە ئەنجامدراوە و لە بەرامبەر پشتکردن لە بەرەی ئۆپۆزسیۆن لە هەڵبژاردنی شارەوانییەکانی تورکیادا حکومەت قەییوم ناخاتە شوێنی سەرۆک شارەوانییە هەڵبژێردراوەکانی هەدەپە.
لە ڕاپۆرتەکەدا کە ڕۆژی ٢٨ی ئاب بڵاوکراوەتەوە ئاماژە بە "دانوستانی نهێنی" نێوان ئاکەپە و هەدەپە کراوە، لەو ڕاپۆرتەدا باس لەوە کراوە، ئاکەپە بەڵێنی ئەوەی بە بەرپرسانی هەدەپە و پارتی چەپی سەوز (یەسەپە) داوە، "ئەگەر بێت و هەدەپە/ یەسەپە پشتیوانی لە کاندیدەکانی پارتی گەلی کۆماری (جەهەپە)  بە سەرۆکایەتی کەمال کلیچدارئۆغڵو لە هەڵبژاردنی شارەوانییەکانی ٣١ی مارتی ٢٠٢٤ نەکات، ئەوا لە دۆخی دەرچوونی کاندیدەکانی یەسەپە بۆ سەرۆکایەتی شارەوانی، لەلایەن حکومەتەوە قەییوم ناخرێتە شوێنی ئەو سەرۆک شارەوانییانەی یەسەپە کە هەڵبژێردراون".
ڕێککەتنێکی لەم جۆرە ئەگەر بە نهێنیش بێت، زیانی گەورە لە بەرەی ئۆپۆزسیۆنی تورکیا دەدات و بە قازانجی ئاکەپە و هەدەپە/ یەسەپە کۆتایی دێت. بەمجۆرە هەم ئاکەپە شارەوانی گەورە شارەکانی وەک ئیستەنبوڵ، ئەنقەرە، ئیزمیر، بوڕسا و ئەنتالیا دەباتەوە، هەم ژمارەیەکی زۆر لە سەرۆک شارەوانی شارە گەورەکانی باکووری کوردستان و قەزا و ناحیەکانی دەکەوێتەوە دەستی هەدەپە/ یەسەپە و مەترسی لابردنیان و دانانی قەییوم لە شوێنیان نامێنێت.
لەلایەکی دیکەوە لە ڕاپۆرتەکەدا ئاماژە بە لێدوانێکی مێرال دانش بێشتاش Meral Danış Beştaş سەرۆکی فراکسیۆنی یەسەپە لە پەرلەمانی تورکیا کراوە کە لە بەرنامەیەکی تەلەفزیۆنیدا ئاماژەی بە ئەگەری بوونی کاندیدی هەدەپە/یەسەپە بۆ سەرۆکایەتی شارەوانی ئیستەنبوڵ و ئەنقەرە کردووە. ئەمەش وەک وەڵامێک بۆ ئەو ڕەخنانەی دەربارەی نەبوونی کاندیدی هەدەپە لە هەڵبژاردنی شارەوانییەکانی ٢٠١٩ لە ئەنقەرە و ئیستەنبوڵ و سەرۆکایەتی کۆمار لە ٢٠٢٣ لە هەدەپە گیراوە.
بوونی کاندیدی هەدەپە/یەسەپە بۆ سەرۆکایەتی شارەوانی ئەنقەرە و ئیستەنبوڵیش هەرچەندە کاندیدەکانی هەدەپە/یەسەپە خۆشی سەرناکەون، بە مانای سەرکەوتنی ئاکەپە و شکستی گەورەی جەهەپە دێت. 
ئەمە لە کاتێکدایە دوای شکستی هەدەپە لە هەڵبژاردنەکانی ١٤ی ئایاری ئەمساڵی سەرۆکایەتی کۆمار و پەرلەماندا، هەم لە ئاستی بەرپرس و نوخبە و هەم لە ئاستی ئەندام و لایەنگرانی هەدەپە-دا، بابەتی پشتیوانی هەدەپە/ یەسەپە لە بەرەی ئۆپۆزسیۆن ڕووبەڕووی ڕەخنەی توند بووەوە.
بەرپرس و ئەندامانی هەدەپە جەختیان لەوە کردووەتەوە، "پشتیوانی پارتەکەیان لە بەرەی ئۆپۆزسیۆنی تورکیا نەک هیچ سودێکی پێیان نەگەیاندووە، بەڵکو هۆکارێکی سەرەکی بووە بۆ بچووکبوونەوەی هەدەپە".
ئەمە جگە لەوەی بەهۆی پشتیوانی توندی هەدەپە/یەسەپە لە بەرەی ئۆپۆزسیۆن بەدرێژایی دە ساڵی رابردووە، پەیوەندییەکانی هەدەپە لەگەڵ پارتی دەسەڵاتداری تورکیا ئاکەپە و خودی سەلاحەدین دەمیرتاش هاوسەرۆکی پێشووی زیندانیکراوی هەدەپە و ڕەجەب تەیب ئەردۆغان سەرۆک کۆماری ئەو وڵاتە بە تەواوی تێکچووە.
هەر ئەوەش هۆکارێکی گرنگ بووە بۆ تێکچوونی زیاتری دۆخی باکووری کوردستان لەڕووی ئەمنی، سیاسی و ئابوورییەوە.  

سەرچاوە: سایتی DW Türkçe
https://www.dw.com/tr/hdpnin-yspye-devri-k%C3%BCrt-siyasetini-nas%C4%B1l-etkiler/a-66651575