تاک
دوابەدواى زیاد بوونى چالاکییە زەمینی و ئاسمانییەکانى سەربازەکانى ئەمەریکا لە عێراق و  ڕۆژهەڵاتى سوریا، گومان دەکرێت کە هێزەکانى ئەمەریکا بیانەوێت پڕۆسەیەکى سەربازى دژ بە سوپاى سوریا و هاوپەیمانەکانى لە ڕۆژهەڵاتى سوریا ئەنجام بدەن، ئەم گریمانەیەش پرسیارێک دروست دەکات کە ئایا کوردەکان لەم پڕۆسە سەربازییەدا بەشدارى دەکەن؟
لەماوەى چەند هەفتەى ڕابردوودا، فڕینی فرۆکە ئەمەریکییەکان بە سەر سنوورى ئاسمانى عێراق و سوریا و گواستنەوەى هێز بە شێوەیەکى بەرچاو زیادى کردووە، هەرچەند کە بەرپرسە فەرمییەکانى عێراق و ئەمەریکا ئەم جوڵانەى هێزەکانى ئەمەریکا ئاسایی لێکدەدەنەوە، بەڵام گۆڕانکارییەکان لەسەر زەوى باس لە پلانێکى قووڵتر دەکەن.
هاوکات لەگەڵ زیادبوونى جوڵەى هێزەکانى ئەمەریکا لە ڕۆژهەڵاتى سوریا، هەندێک گرووپی چەکدارى لۆکاڵى و هۆزەکانى سوریا کەوتونەتە جوڵە، هەندێک لە شرۆڤەکاران و میدیاکاران بە ئاماژەدان بەو جوڵانە دەڵێن: ئەگەر هەیە هەندێک لەو هۆزانەى کە پەیوەندییەکى باشیان لەگەڵ هێزەکانى سوریاى دیموکرات و ئەمەریکا هەیە، هێرش بکەنە سەر سوپاى سوریا و بەرەى بەرگرى لە خۆرئاواى فورات بە تایبەت ناوچەى ئەلبوکەمال  و بە پشتیوانى هێزەکانى ئەمەریکا دەست بەسەر هەندێک ناوچەدا بگرن.
دواى دروستبوونى ئەو گومانانە، فەرهاد شامى بەرپرسی ڕاگەیاندنى هێزەکانى سوریاى دیموکرات (SDF) لە چاوپێکەوتنێکیدا لەگەڵ تۆڕى هەواڵى (الیوم) رایگەیاند، کە هێزەکانى سوریاى دیموکرات بەشدارى لە هیچ پڕۆسەیەکى سەربازیدا ناکەن دژ بە ئێران و بەرەى بەرگرى لە سوریا و ئەرکى سەرەکى ئەوان بریتی دەبێت لە پاراستنى ئاسایش لە سوریا، ئەو قسانەش کە دەکرێت لەسەر هێرشکردنە سەر ئێران لە لایەن هاوپەیمانى نێودەوڵەتییەوە، راست نییە و هێزەکانى ئێمە ئاگرى هیچ بەرەیەک خۆشناکەن و کارى سەرەکى ئێمە ڕووبەڕووبوونەوەى چالاکى پاشماوەکانى داعشە لە ناوچەکە.
بە پێى وتەى بەرپرسی ڕاگەیاندنى هێزەکانى سوریاى دیموکرات، دەردەکەوێت کە ئەو هێزانە لەئەگەرى ئەنجامدانى پڕۆسەى سەربازى لەلایەن هێزەکانى ئەمەریکا دژ  بە بەرەى بەرگرى، بەشدارى (ئاشکرا) ناکەن، بەڵام لەگەڵ ئەوەشدا لە ئەگەرى ئەنجامدانى پڕۆسەى سەربازى لە لایەن ئەمەریکاوە لە ڕۆژهەڵاتى سوریا، هێزەکانى سوریاى دیموکرات بە هۆى گرێدراویان بە ئەمەریکا و هەوڵ بۆ ڕازىکردنى ئەمەریکا، ناچار دەبن بەشێک لە بنکە و بارەگاکانیان بخەنە خزمەت هێزەکانى ئەمەریکا و هاوپەیمانەکانى تا ببێتە پشتیوانى بۆ ئەو هێزانەى کە  بە شدارى لە پرۆسەکەدا دەکەن.
سەربارى ئەو هەواڵ و وتانەى لەو بارەوە خراوەتەڕوو، ئەگەر هەیە کە هێزەکانى ئەمەریکا لە عێراق  وسوریا کارى تێکدەرانە ئەنجام بدات، هەروەها پێشبینی دەکرێت لە بەر ڕازى نەبوونى هێزەکانى سوریاى دیموکرات بە بەشدارى کردن لە پڕۆسەى سەربازى دژ بە ئێران و بەرەى بەرگرى لە ڕۆژهەڵاتى سوریا، ئەمەریکییەکان هەوڵبدەن وەبەرهێنان بکەن لەسەر هۆزەکانى سوریا و گروپە چەکدارە لۆکاڵییەکان بۆ پەلاماردانى کاروانى هێزەکانى سوپاى سوریا و بەرەى بەرگرى لە ڕێگەى شەڕى پارتیزانییەوە.


سەرچاوە: تحولات جهان اسلام
https://iswnews.com/101969/101969/