تاک
لە مانگی نیسانی ڕابردوودا محەمەد شیاع سوودانی و مەسرور
بارزانی ڕێککەوتنێکیان سەبارەت بە پشکی هەرێمی کوردستان لە بودجەی عێراقدا واژۆکرد،
شارەزایان ئاماژە بۆ ئەوە دەکەن، ئێستا هەرێمی کوردستان بەتەواوی وابەستەی عێراق
بووە و ناچارە لەگەڵ ئەو پارەیەی عێراق بۆی دەنێرێت خۆی بگونجێنێت.
شارەزای ئابووری گۆڤەند شێروانی بە میدیا عێراقییەکانی
وتووە، "بەپێی یاسای بودجە و ئەو خشتەیەی دانراوە پشکی هەرێمی کوردستان 16.4
تریلیۆن دینارە بۆ ساڵێکی تەواو، ئەوەش دەکاتە مانگانەی 3.1 تریلیۆن دینار".
ئاماژەی بەوەش کردووە، "ئەگەر ئەو پشکە مانگانەیە
داهاتە نەوتییەکانی لێدەربهێنرێت، مانگانە نزیکەی 960 ملیار دینار دەمێنێتەوە وەک
پشکی هەرێمی کوردستان".
لەلایەکی دیکەوە سامان نوح چاودێریی سیاسی ڕایگەیاندووە،
"ئێستا هەرێمی کوردستان گیرۆدەی کێشەی گەورەی ئابووری و کورتهێنانە"، ڕوونیکردەوە،
کێشەی مووچە و دواکەوتنی لە ساڵی 2015ـەوە بەردەوام هەبووە، بەڵام لە ماوەی ڕابردوودا
پەیوەندیی بە دابەزینی نرخی نەوت لە جیهان و چوونی داهاتی نەوت بە بڕێکی زۆر بۆ کۆمپانیاکان
دەگەڕایەوە، بەڵام ئەم دواکەوتنەی مووچە لە ئێستادا پەیوەندیی بە بڕیارەکەی دادگای
ناوبژیوانیی پاریسەوە هەیە بۆ ڕاگرتنی نەوتی هەرێمی کوردستان، "ئەمەش هەرێمی
کوردستانی وابەستەی بەغدا کردووە و ناچاری دەکات ملبدات بۆ ئەو بڕە پارەیەی بەغدا
ڕەوانەی دەکات".
هەروەها عەبدولڕەحمان مەشهەدانی شارەزای ئابووریی عێراقی
ڕایگەیاند، "پشکی هەرێمی کوردستان بە سەرجەم داهاتەکانەوە ٪12.67ـە، بەڵام هەرێمی
کوردستان داهاتەکان ڕادەست ناکات، بۆیە پێویستە بەو بڕە پارەیە قایل ببێت کە ڕەوانە
دەکرێت، سەرەڕای ئەوەی بڕیارە وەزیرانی دارایی هەرێمی کوردستان و عێراق لەبەردەم لیژنەی
دارایی ئەنجومەنی نوێنەرانی عێراق داتاکەن دەخەنەڕوو، ئەوکاتە ژمارەکان ڕاستییەکان
دەڵێن.
ئاماژە بۆ ئەوە دەکات، تاوەکو ساڵی 2016 هەرێمی
کوردستان پشکی تەواوی خۆی لە بودجە وەردەگرت بەبێ ئەوەی هیچ داهاتێک ڕادەست بکات،
بەڵام لە 2016دا لە حکومەتی حەیدەر عەبادیدا بڕیاریدا کە پێویستە هەرێمی کوردستان
داهاتی نەوت ڕادەست بکات تاوەکو پشکی خۆی لە بودجە بۆ ڕەوانە بکرێت.
دەشڵێت، بۆیە لە دوای 2016وە ئەو پارانەی لە حکومەتەکەی
عادل عەبدولمەهدی، مستەفا کازمی و ئەم حکومەتەی ئێستای محەمەد شیاع سوودانیشەوە ڕەوانەی
هەرێمی کوردستان دەکرێت، سەرجەمیان قەرزن.
https://esta.krd/269103/
#ئابووری
#باشووری_کوردستان
#عێراق
بینێرە لە ڕێگەی