تاک
سەرۆك كۆمار دەستپێشخەریەك بۆ كەركوك ڕادەگەیەنێت
عەبدوللەتیف جەمال ڕەشید سەرۆك كۆماری عێراق لە چاوپێكەوتنێكی لەگەڵ كەناڵی (الحدث)ی عێراقی دەستپێشخەرییەكی بۆ چارەسەری دۆخی كەركوك ڕاگەیاند و وتی "پێویستە حكومەتێكی تەوافوقی خۆجێیی لە سەرجەم پێكهاتەكانی شارەكە دروست بكرێت، هەردوو حكومەتی هەرێمی كوردستان و حكومەتی فیدراڵی پاڵپشتی بكەن".[1]

بایدن پشتیوانی ڕێگوزەری دیموكراسی لە عێراق دەكات
بەبۆنەی ڕۆژی سەربەخۆیی عێراقەوە، ئیلینا ڕۆمانوسكی باڵیۆزی ویلایەتە یەكگرتووەكانی ئەمەریكا لە عێراق نامەیەكی جۆ بایدن سەرۆكی وڵاتەكەی گەیاندە وەزارەتی دەرەوەی عێراق تا بیگەیەننە دەست عەبدوللەتیف ڕەشید سەرۆك كۆماری عێراق، بایدن لە نامەكەدا وێڕای پیرۆزبایی لە عێراق پاڵپشتی خۆی بۆ بەرەوپێشچوونی پرۆسەی دیموكراسی دوپاتكردوەتەوە و هەماهەنگی هەردولای بۆ بەرەنگاربونەوەی داعش و چەسپاندنی ئاشتی بە پێویست زانیوە[2]

چوار سەرۆكایەتییەكەی عێراق هێرشەكانی توركیا ڕەتدەكەنەوە
لە كۆبوونەوەی هاوبەشی هەرچوار سەرۆكایەتییەكەی عێراق (سەرۆك كۆمار، سەرۆك وەزیران، سەرۆكی ئەنجومەنی نوێنەران، سەرۆكی ئەنجومەنی دادوەری) چەند بابەتێكی پەیوەست بە ناوخۆی عێراق گفتوگۆی لەسەر كرا، لە بەیاننامەی كۆبوونەوەدا هەر چوار سەرۆكایەتییەكە هێرش و بۆردوومانەكانی توركیا-یان بۆ سەر خاكی عێراق ڕەتكردەوە و ڕایانگەیاند، ئەوە لەگەڵ بنەمای دراوسێیەتی باش ناكۆكە و پێویستە كێشە و ناكۆكییەكان لە ڕێگەی گفتوگۆ و لێكتێگەیشتنەوە چارەسەر بكرێت.[3]

كارەبای عێراق بە ئوردنەوە دەبەسرێتەوە
زیاد عەلی وەزیری كارەبای عێراق 30/9 ئاشكرای كرد كارەبای عێراق بە ئوردنەوە بەستراوەتەوە و لە چەند ڕۆژی داهاتوو تەزووی كارەبا دەگاتە عێراق، لە قۆناغی یەكەم بڕی (150) مێگاوات دەگاتە عێراق و لە ئایندەدا بڕەكەی زیاد دەكرێت.[4]

عێراق و توركیا چەند لیژنەیەكی هاوبەش پێكدێنن
لە كۆبوونەوەی هەردوو وەزیرانی گواستنەوەی عێراق و توركیا گفتوگۆ لە بارەی پرۆژەی ڕێگەی گەشە كرا، هەر دوو لا ڕێكکەوتن چەند لیژنەیەكی هاوبەش پێكبێنن لە بوارەكانی هونەری، یاسایی و دارایی تا بابەتەكانی پەیوەست بە رێگەی گەشە تاوتوێ بكەن و دەستبكرێت بە جێبەجێكردنی پرۆژەكە.[5]

عێراق قەرزی گازی سروشی دەداتەوە بە ئێران
عەلی عەلاق پارێزگاری بانكی ناوەندی عێراق 1/10/2023 ئاشكرای كرد، لەگەڵ ئێران گەیشتوونەتە ڕێکكەوتن بۆ پێدانەوەی قەرزی گازی سروشتی بە ئێران، پێدانەوەی قەرزەكەش بەجۆرێك دەبێت كە عێراق ڕووبەڕووی سزادانی ئەمەریكا نەبێتەوە.[6]

ڕوسیا خوازیارە لە عێراق بەشداری ڕێگەی گەشە بكات
ئیگۆر لیڤیتین یاریدەدەری سەرۆكی ڕوسیا لە سەردانی بۆ عێراق بە پەرپرسانی عێراقی ڕاگەیاندووە، وڵاتەكەی خوازیارە لە بواری گواستنەوە هاوكاری عێراق بكات و لە پرۆژەی ڕێگەی گەشە بەشداری بكات.[7]

ڕوسیا و عێراق لێكتێگەشتنێك بۆ بەرەنگاربوونەوەی گەندەڵی واژۆ دەكەن
لە چوارچێوەی سەردانی ئیگۆر لیڤیتین یاریدەرەی سەرۆكی ڕوسیا بۆ عێراق، ناوبراو لەگەڵ دەستەی دەستپاكی عێراق كۆبووەوە و هەر دوو لا لێكتگەیشتنێكیان واژۆ كرد، ئامانج لە لێكتێگەیشتنەكە ڕادەستكردنەوەی داواكراوانی تێوەگلاو لە گەندەڵی و ڕێگرییە لە سپیكردنەوەی پارە.[8]

دە كۆمپانیای ڕووسی عێراق جێدەھێڵن
حكومەتی عێراق گرێبەستی لەگەڵ (10) كۆمپانیای ڕووسی كردبوو بۆ چاكردنەوەی كارگەی بەرهەمهێنانی شوشە لە ڕومادی كە ماوەی حەڤدە ساڵە بە هۆی كاری تیرۆریستییەوە لەكاركەوتووە، بەڵام بەهۆی جەنگی ڕوسیا و ئۆكرانیا ئەو كۆمانیایانە عێراقیان جێهێشتووە، لە ئێستادا حكومەتی عێراق گرێبەستی نوێی لەگەڵ چەند كۆمپانیایەكی چینی كردووە بۆ نۆژەنكردنەوە و كارپێكردنەوەی كارگەكە.[9]

سەرۆك وەزیران لەگەڵ بلاسخارت تاوتوێی چەند دۆسیەیەك دەكات
محەممەد شیاع سودانی سەرۆك وەزیرانی عێراق لە دیداری لەگەڵ جنین بلاسخارت نوێنەری تایبەتی نەتەوە یەكگرتووەكان لە عێراق باسی لە دۆسیەی ئاوارەكان و گەڕانەوەیان بۆ زێدی خۆیان و ئەو ئامادەسازییانە كرد كە بۆ بەڕێوەچوونی هەڵبژاردنی ئەنجومەنی پارێزگاكانی عێراق كراون، هەروەها هەوڵەكانی عێراق بۆ ڕووبەڕووبوونەوەی گۆڕانكارییەكانی كەشوهەوا و مەترسییەكانی كە عێراق بەدەستیەوە دەناڵێنێت باسیان لێوەكرا.[10]

لە داهاتوودا سەرۆكی فەڕەنسا سەردانی عێراق دەكات (4/10/2023)
محەممەد شیاع سودانی سەرۆك وەزیرانی عێراق پێشوازی كرد لە باتریك دۆرێل ڕاوێژكاری كاروباری ڕۆژهەڵاتی ناوەڕاست لە سەرۆكایەتی كۆماری فەڕەنسا، لە دیدارەكەدا باس لە پەیوەندییەكانی نێوان هەردوو وڵات و سەردانی ئیمانویل ماكرۆن سەرۆكی فەڕەنسا بۆ عێراق لە داهاتویەكی نزیكدا كرا.[11]





[1]https://www.middle-east-online.com/
[2]https://www.youm7.com/story/2023/10/4
[3]https://www.aljazeera.net/news/2023/10/2/
[4]https://www.aljazeera.net/ebusiness/2023/9/30
[5]https://shafaq.com/ar
[6]https://www.aljazeera.net/ebusiness/2023/10/1
[7]https://www.alsumaria.tv/news/economy/469569
[8] https://www.ina.iq/194700--.html
[9]https://almaalomah.me/news/42556
[10]https://shafaq.com/ar
[11] https://www.facebook.com/photo/?fbid=754134413427187&set=a.295186165988683&locale=ar_AR