تاک
دادگای فیدراڵی بە فەرمی داوای لە هەرێم كردووە كۆتایی بە كاری ئەنجومەنی پارێزگاكان بێنێت
دادگای فیدراڵی عێراق بە فەڕمی نووسراوێكی ئاڕاستەی حكومەتی هەرێمی كوردستان كردووە كە كۆتایی بە كارەكانی ئەنجومەنی پارێزگاكانی هەرێم بێنێت، ئەمەش دوای ئەوە دێت كە لە (24 ئەیلوولی 2023) دادگای فیدراڵی بڕیاری دا بە نایاسییبوونی درێژكردنەوەی ماوەی كاركردنی ئەنجومەنی پارێزگاكانی هەرێمی كوردستان.[1]

هەوڵی پەرلەمانی هەیە بۆ هەمواركردنەوەی بڕگەیەكی یاسای تایبەت بە مووچەخۆرانی هەرێم
یوسف كیلابی ئەندامی لیژنەی دارایی لە ئەنجومەنی نوێرانی عێراق ئاشكرای كردووە لە ئەنجومەنی نوێنەران هەوڵ و جوڵەیەك هەیە بۆ هەمواركردنەوەی بڕگەیەك لە یاسای بوجە تایبەت بە مووچەی مووچەخۆرانی هەرێمی كوردستان، هەوڵەكان بە ئاڕاستەیەكە مووچەی فەرمانبەران ڕاستەوخۆ لە بەغداوە بدرێت و ئەو بڕە لە بودجەی هەرێمی كوردستان دابشكێنرێت.[2]

دانوستانی نەوت و گاز لە نێوان بەغدا و هەولێر شكستی هێناوە
بەپێی ڕاپۆرتێكی ڕۆژنامەی (ئەلعەرەب) كە ڕۆژی (15/10/2023) بڵاوی كردووەتەوە، دانوستانەكانی نەوت و گاز لە نێوان حكومەتی فیدراڵی و حكومەتی هەرێم شكستی هێناوە و هیچ بەرەوپێشچونێكی بەخۆوە نەبینیوە، هەر دوو لا مكوڕن لەسەر داواكارییەكانیان و دەیانەوێت دەسەڵاتیان بەسەر كێڵگەكانی نەوت و بەرهەمهێنانیدا هەبێت، ئەو ڕێكکەوتنانەش كە لە نێوان هەر دوو لا كراون چارەسەری ڕیشەیی و كۆتایی بۆ دۆسیەكە تێدا نییە و ڕێكکەوتنی كاتین و هیچ ئاسۆیەكی نزیك بۆ رێكەوتنی نێوان بەغدا و هەولێر نییە.[3]

لیژنەی نەوت و گاز: بڕیاری دادگای پاریس پابەندكەرە
باسم غەریباوی ئەندامی لیژنەی نەوت و گاز لە ئەنجومەنی نوێنەرانی عێڕاق ڕایگەیاند، پێویستە عێراق فشار بخاتە سەر توركیا بۆ جێبەجێكردنی بڕیاری دادگای ناوبژیوانی پاریس سەبارەت بە هەناردەكردنی نەوت و ئەو قەرەبووەی بەسەر توركیادا سەپێنراوە، كە بڕەكەی ملیارێك و 400 ملیۆن دۆلارە، دەبێت توركیا قەرەبووەكە بداتە عێراق، چونكە توركیا ڕێكکەوتنی هەناردەكردنی نەوتی نێوان هەر دوو وڵاتی پێشێل كردووە.
غەریباوی دەشڵێت، پێویستە عێراق ڕێگەی تر بدۆزێتەوە بۆ هەناردەكردنی نەوتی هەرێم، یان لە ناوخۆدا بەكاریبێنێت و زیادەكەی هەناردە بكات.[4]

توركیا چەند پێشنیارێك سەبارەت بە پەكەكە دەداتە عێراق
لە چەند ڕۆژی ڕابردوو بەرپرسانی توركیا پێشنیاریان بۆ بەرپرسانی عێراق كردووە كە لە ڕووی سەربازی و هەواڵگرییەوە هاوكاری لایەنی عێراقی دەكەن بۆ كۆتاییهێنان بە مەترسییەكانی پەكەكە، هەروەك پێشنیاریشیان كردووە گرووپە چەكدارەكانی شیعە لەوانە كەتیبەكانی حزبوڵڵا و عەسائیبی ئەهلی حەق پەیوەندییەكانیان لەگەڵ پەكەكە بپچڕێنن.[5]

ژمارەیەك بەربژێری هەڵبژاردنی ئەنجومەنی پارێزگاكان پاشەكشە دەكەن
ژمارەیەك بەربژێری هەڵبژاردنی ئەنجومەنی پارێزگاكانی عێراق كە بڕیارە لە 18ی كانوونی یەكەم بەڕێوەبچێت پاشەكشە دەكەن، ئەو بەربژێرانەی پاشەكشەیان كردووە ئاشكرایان كردووە مەترسی لەسەر ژیانی خۆیان و كەسوكاریان هەیە و هەڕەشەیان لێكراوە، هەمووشیان لەو كەسانەن كە سەر بە رێكخراوە مەدەنی و حزبە نوێیەكانن، هەندێكیشان بە تۆمەتی پەیوەندی بە حزبی بەعسەوە دوورخراونەتەوە.
چاودێران پێیان وایە هێز و پارە لەدەست هێزە تەقلیدی و گرووپە چەكدارەكانە و هەر ڕكابەرێكی ئەوان ژیان و داهاتووی لە مەترسیدایە و ئەو گرووپانەش دەیانەوێت دەسەڵات لە دەست خۆیان بێت، بۆیە هەڕەشە لە بەربژێرە سەربەخۆكان دەكەن و ناچار بە پاشەكشەیان دەكەن.[6]

داوای هەڵوەشاندنەوەی دەستەی لێپرسینەوەی بەعس دەكرێت
محەممەد حەلبوسی سەرۆكی ئەنجومەنی نوێنەرانی عێراق نووسراوێكی ئاڕاستەی دەستەی لێپرسینەوەی بەعس كردووە و داوا دەكات بە زووترین كات دۆسییەكانییان ئاڕاستەی پەرلەمان بكەن تا ئەوەی پێویستە لێپرسینەوەی لەگەڵ بكرێت دۆسیەكەی بدرێتە دادگا و دەستەكە كۆتایی بە كارەكانی بهێنرێت. جێی باسە یەكێك لە مەرجی سوننەكان لە كارنامەی سیاسیی كابینەكەی محەممەد شیاع سوودانی بریتی بوو لە هەڵوەشاندنەوەی دەستەی لێپرسینەوەی بەعس، چونكە بە بڕوای سوننەكان ئەو دەستەیە كراوەتە ئامڕازێكی سیاسیی بۆ تۆمەتباركردنی نەیارانی هێزە شیعەكان بە بەعسیبوون و دواجاریش سزادانیان و دوورخستەوەیان لە پرۆسەی سیاسیی.[7]

عێراق ڕێوشوێنی توند بۆ پاراستنی باڵیۆزخانەكان دەگرێتەبەر
حكومەتی عێراق هێزە ئەمنییەكانی ڕاسپاردووە ڕێوشوێنی پاراستنی باڵیۆزخانەكان توند بكەنەوە، ئەمەش دوای ڕووداوەكانی فەلەستین دێت كە هەندێك لە وڵاتان پشتیوانی خۆیان بۆ ئیسرائیل دەربڕیوە، ئەگەری هەیە باڵیۆزخانەی ئەو وڵاتانە لە عێراق ڕووبەڕووی هێرش ببنەوە، هەندێك گرووپی چەكداری عێراقی هۆشدارییان دایە ئەمەریكا و وڵاتانی تر ئەگەر بەشێوەی ڕاستەوخۆ بەشداری شەڕ بكەن لە پاڵ ئیسرائیل، ئەوا لەلایەن ئەو گرووپانەوە بە ئامانج دەگیرێن.[8]

هەینی گەردەلولی ئەقسا لە بەغدا بەڕێوەچوو
ڕۆژی هەینی (13/10/2023) لە سێ ناوچەی بەغدا (گۆڕەپانی تەحریر، یەرموك و ئەعزەمیە) خۆپیشاندانی بەرفراوان بەڕێوەچوو، خۆپیشاندەران ئاڵای ئیسرائیلیان سووتاند، پشتیوانی خۆیان بۆ فەلەستین دەربڕی، ژمارەیەك لە سەركردەی حزب و گرووپەكان و زانایانی ئایینی لە هەردوو پێكهاتەی شیعە و سوننە ئامادەی خۆپیشاندانەكە بوون و وتاریان پێشكەش كرد.[9]

سەرۆك وەزیرانی عێراق و سەرۆكی ئێران تاوتوێی دۆخی فەلەستین دەكەن
ڕۆژی (14/10/2023) ئیبراهیم ڕەئیسی سەرۆك كۆماری ئێران پەیوەندییەكی تەلەفۆنی لەگەڵ محەممەد شیاع سوودانی سەرۆك وەزیرانی عێراق ئەنجام دا، هەر دوو لا تاوتوێی دۆخی فەلەستینیان كرد، هەروەها باسیان لە گەیاندنی هاوكاری مرۆیی و تەندروستی بە غەززە كرد.[10]

شیعەكان، پارتی بە بوونی پەیوەندی لەگەڵ ئیسرائیل تۆمەتبار دەكەن
سەعد مەتڵەبی ئەندامی ئیئتیلافی دەوڵەتی قانون، پارتی دیموكراتی كوردستان بە بوونی پەیوەندی لەگەڵ ئیسرائیل تۆمەتبار دەكات، ناوبراو دەڵێت "بێدەنگی و هەڵوێستی پارتی لەمەڕ ئەوەی لە غەززە دەگوزەرێت لەگەڵ سیاسەتی دەرەوەی حكومەتی عێراق یەكناگرێتەوە و ئاماژەیە بۆ بوونی پەیوەندی مێژوویی پارتی بە دەوڵەتی ئیسرائیلەوە".[11]

سەركردەی گرووپە چەكدارەكانی عێراق سەردانی مەیدانیی لوبنان و سوریا دەكەن
وەك ئامادەسازییەك بۆ هەر ئەگەرێكی چاوەڕوانكراو و فراوانبوونی شەڕی نێوان ئیسرائیل و فەلەستین، ژمارەیەك سەركردەی گرووپە چەكدارەكانی عێراق نزیك لە ئێران بەشێوەی بەردەوام و بە نهێنی سەردانی مەیدانیی ناوچە سنورییەكانی ئیسرائیل لەگەڵ هەردوو وڵاتی لوبنان و سوریا دەكەن، ئەوان لە سەردانەكانیان نەخشە و زانیاری لەسەر ئەو ناوچانە كۆ دەكەنەوە و ئامادەسازی دەكەن بۆ بەشداریكردن لە شەڕ لە ئەگەری فراوانبوونی ئاڵۆزییەكان و شەڕی ئیسرائیل و فەلەستین.[12]

ئەنجومەنی نوێنەرانی عێراق ژمارەیەك بڕیار دەربارەی دۆخی فەلەستین دەردەكات
ئەنجومەنی نوێنەرانی عێراق لە دانیشتنی ڕۆژی (15/10/2023) ژمارەیەك بڕیاری سەبارەت بە دۆخی فەلەستین دەركرد، لە بڕیارەكاندا سەركۆنەی هێرشەكانی ئیسرائیل كراوە، داوا لە حكومەتی عێراق كراوە هاوكاری گەلی فەلەستین بكات، داواش كراوە كۆبوونەوەیەكی پەرلەمانەكانی عەرەب لە بەغدا ببەسرێت.[13]

هێرشێكی فڕۆكەی بێفڕۆكەوان بۆسەر هێزەكانی ئەمەریكا پووچەڵ كرایەوە
بەرپرسێكی هێزەكانی ئەمەریكا لە عێراق ڕایگەیاند (18/10/2023) لە رێگەی دوو فڕۆكەی بێفڕۆكەوان هێرشكراوەتە سەر هێزەكانی ئەمەریكا لە بنكەی ئاسمانی عەین ئەسەد، بەڵام هێرشەكان پووچەڵ كراونەوە، ئەمەش لە كاتێكدایە كە شەڕی حەماس و ئیسرائیل لە پەرەسەندندایە و بەو هۆیەشەوە ئەمەریكا سەرجەم هێزەكانی لە عێراق خستووەتە حاڵەتی ئامادەباشییەوە بۆ ئەگەری هێرشی گرووپە چەكدارەكان.[14]

حكومەتی عێراق سێ ڕۆژ ماتەمینی ڕاگەیاند
دوابەدوای هێرشی ئیسرائیل بۆسەر نەخۆشخانەی مەعمەدانی لە غەززە و كوژران و برنداربوونی سەدان كەس لەو نەخۆشخانەیە، حكومەتی عێراق سەركۆنەی هێرشەكەی كرد و ماتەمینی سێ ڕۆژی ڕاگەیاند.[15]

بەهۆی وشكەساڵی نۆ پارێزگای عێراق دەچنە بازنەی سوورەوە
بەهۆی وشكەساڵی و گۆڕانی كەشوهەوا نۆ پارێزگای ناوەڕاست و باشووری عێراق دەچنە خانەی بازنەی سوور، بەگوێرەی زانیارییەكان عێراق (20%)ی زەوییە كشتوكاڵییەكانی پێشتری لە دەست داوە و ئێستا بەهۆی كەمئاوی بە كەڵكی كشتوكاڵ نایەن، هاوكات كۆچێكی ناچاری لەو پارێزگا و ناوچانەوە دەستی پێ كردووە كە دەكەونە بازنەی سوور و ئەمەش كاریگەری نەرێنی لەسەر دیمۆگرافیای عێراق دەبێت.[16]

مادەی هۆشبەر هەڕەشە لە قەوارەی عێراق دەكات
عەبدولئەمیر شەمەری وەزیری ناوخۆی عێراق ڕایگەیاند "مادەی هۆشبەر مەترسیدارترین تاوانە كە هەڕەشە لە قەوارەی دەوڵەتی عێراق دەكات، پێویستە ئەم دۆسیەیە ببێتە پێشینەی كاری بەرپرسان و خاوەن بڕیارەكانی عێراق، بەپێی بەدواداچوونەكان حەبی كبتاگۆن لە سوریا و حەشیشە و سەرجەم مادە هۆشبەرەكانی تر لە ئێران و توركیاوە دێن".[17]

ژمارەی ملیاردێر و ملیۆنێرەكان لە عێراق گەیشتووەتە 16 هەزار
نەبیل مەرسومی شارەزای ئابووری بە پشتبەستن بە داتاكانی سەنتەری فەڕەنسی بۆ توێژینەوە ئاشكرای دەكات لە عێراق 36 ملیاردێر هەن كە سەروەتی هەریەكەیان لە یەك ملیار دۆلار زیاترە، 16 هەزار ملیۆنێریش هەن كە سەروەتی هەریەكەیان لە ملیۆنێك دۆلار زیاترە، ئەو ژمارە زۆرەی دەوڵەمەندیش لە عێراق زیاترە لە دەوڵەمەندانی نۆ وڵات پێكەوە، كە بریتین لە: ئیمارات، كوەیت، لوبنان، مەجەر، ڕۆمانیا، پرتوگال، هۆڵەندا، دانیمارك و نەیجیریا.[18]

نۆ ئەندامی داعش لە 6 پارێزگا دەستگیر كران
بەڕێوەبەرایەتی هەواڵگری سەربازی ئاشكرای كرد، لە چەند ئۆپەراسیۆنێكی جیاوازدا 9 ئەندامی داعش لە پارێزگاكانی بەغدا، ئەنبار، كەركوك، نەینەوا، میسان و سەلاحەدین دەستگیر كراون.[19]



[1] https://baghdadtoday.news/233376-%D8%B1%D8%B3%D9%85%D9%8A%D9%8B%D8%A7.-%D8%A7%D9%84%D9%85%D8%AD%D9%83%D9%85%D8%A9-%D8%A7%D9%84%D8%A7%D8%AA%D8%AD%D8%A7%D8%AF%D9%8A%D8%A9-%D8%AA%D9%8F%D8%A8%D9%84%D8%BA-%D8%A5%D9%82%D9%84%D9%8A%D9%85-%D9%83%D8%B1%D8%AF%D8%B3%D8%AA%D8%A7%D9%86-%D8%A8%D8%A5%D9%86%D9%87%D8%A7%D8%A1-%D8%B9%D9%85%D9%84-%D9%85%D8%AC%D8%A7%D9%84%D8%B3-%D8%A7%D9%84%D9%85%D8%AD%D8%A7%D9%81%D8%B8%D8%A7%D8%AA.html#hathalyoum
[2] https://www.alsumaria.tv/news/alsumariaspecial/470693/%d8%a7%d9%84%d8%a8%d8%b1%d9%84%d9%85%d8%a7%d9%86-%d9%8a%d8%aa%d8%ad%d8%b1%d9%83-%d9%84%d8%aa%d8%b9%d8%af%d9%8a%d9%84-%d9%81%d9%82%d8%b1%d8%a9-%d9%85%d9%86-%d9%82%d8%a7%d9%86%d9%88%d9%86-%d8%a7%d9%84%d9%85%d9%88%d8%a7%d8%b2%d9%86%d8%a9-%d8%aa%d8%ae%d8%b5-%d8%b1%d9%88%d8%a7%d8%aa%d8%a8-%d9%87%d8%b0%d9%87-%d8%a7%d9%84%d9%81%d8%a6%d8%a9?src=rss&utm_source=thewall360&utm_medium=rss-articles&utm_campaign=rss&utm_term=Rss#hathalyoum
[3] https://alarab.co.uk/sites/default/files/2023-10/12923_0.pdf#page=1
[4] https://alsabaah.iq/uploads/public_files/2023-10/5791.pdf
[5] https://www.alaraby.co.uk/politics/%D8%B9%D8%B1%D9%88%D8%B6-%D8%AA%D8%B1%D9%83%D9%8A%D8%A9-%D9%84%D9%84%D8%B9%D8%B1%D8%A7%D9%82-%D9%84%D8%A5%D9%86%D9%87%D8%A7%D8%A1-%D8%AE%D8%B7%D8%B1-%D8%A7%D9%84%D8%B9%D9%85%D8%A7%D9%84-%D8%A7%D9%84%D9%83%D8%B1%D8%AF%D8%B3%D8%AA%D8%A7%D9%86%D9%8A
[6] https://www.alaraby.co.uk/politics/%D8%A7%D9%84%D8%B9%D8%B1%D8%A7%D9%82-%D8%AA%D9%87%D8%AF%D9%8A%D8%AF%D8%A7%D8%AA-%D9%88%D8%A7%D9%86%D8%B3%D8%AD%D8%A7%D8%A8-%D9%85%D8%B1%D8%B4%D8%AD%D9%8A%D9%86-%D9%84%D9%84%D8%A7%D9%86%D8%AA%D8%AE%D8%A7%D8%A8%D8%A7%D8%AA-%D8%A7%D9%84%D9%85%D8%AD%D9%84%D9%8A%D8%A9
[7] https://almadapaper.net/view.php?cat=300102
[8]https://aawsat.com/%D8%A7%D9%84%D8%B9%D8%A7%D9%84%D9%85-%D8%A7%D9%84%D8%B9%D8%B1%D8%A8%D9%8A/%D8%A7%D9%84%D9%85%D8%B4%D8%B1%D9%82-%D8%A7%D9%84%D8%B9%D8%B1%D8%A8%D9%8A/4601501-%D8%A7%D9%84%D8%AD%D9%83%D9%88%D9%85%D8%A9-%D8%A7%D9%84%D8%B9%D8%B1%D8%A7%D9%82%D9%8A%D8%A9-%D8%AA%D8%AA%D8%AE%D8%B0-%D8%A5%D8%AC%D8%B1%D8%A7%D8%A1%D8%A7%D8%AA-%D9%84%D8%AD%D9%85%D8%A7%D9%8A%D8%A9-%D8%A7%D9%84%D8%B3%D9%81%D8%A7%D8%B1%D8%A7%D8%AA-%D9%81%D9%8A-%D8%A8%D8%BA%D8%AF%D8%A7%D8%AF
[9] https://www.alaraby.co.uk/politics/%D8%AC%D9%85%D8%B9%D8%A9-%D8%B7%D9%88%D9%81%D8%A7%D9%86-%D8%A7%D9%84%D8%A3%D9%82%D8%B5%D9%89-%D8%AA%D8%B8%D8%A7%D9%87%D8%B1%D8%A7%D8%AA-%D8%BA%D9%8A%D8%B1-%D9%85%D8%B3%D8%A8%D9%88%D9%82%D8%A9-%D9%81%D9%8A-%D8%A8%D8%BA%D8%AF%D8%A7%D8%AF-%D8%AF%D8%B9%D9%85%D8%A7%D9%8B-%D9%84%D8%BA%D8%B2%D8%A9
[10] https://www.facebook.com/photo/?fbid=760166942823934&set=a.295186165988683&locale=ar_AR
[11] https://almaalomah.me/news/43774/politics/%D8%B9%D9%84%D8%A7%D9%82%D8%AA%D9%87-%D9%82%D9%88%D9%8A%D8%A9-%D8%A8%D8%A7%D9%84%D9%83%D9%8A%D8%A7%D9%86-%D8%A7%D8%A6%D8%AA%D9%84%D8%A7%D9%81-%D8%A7%D9%84%D9%85%D8%A7%D9%84%D9%83%D9%8A-%D9%8A%D9%86%D8%AA%D9%82%D8%AF-%D8%B5%D9%85%D8%AA-%D8%AD%D8%B2%D8%A8-%D8%A8%D8%A7%D8%B1%D8%B2%D8%A7%D9%86%D9%8A-%D8%AA%D8%AC%D8%A7
[12] https://aawsat.com/%D8%A7%D9%84%D8%B9%D8%A7%D9%84%D9%85-%D8%A7%D9%84%D8%B9%D8%B1%D8%A8%D9%8A/%D8%A7%D9%84%D9%85%D8%B4%D8%B1%D9%82-%D8%A7%D9%84%D8%B9%D8%B1%D8%A8%D9%8A/4605856-%D9%82%D8%A7%D8%AF%D8%A9-%D9%81%D8%B5%D8%A7%D8%A6%D9%84-%D8%B9%D8%B1%D8%A7%D9%82%D9%8A%D8%A9-%D9%85%D9%88%D8%A7%D9%84%D9%8A%D8%A9-%D9%84%D8%A5%D9%8A%D8%B1%D8%A7%D9%86-%D8%A5%D9%84%D9%89-%D8%B3%D9%88%D8%B1%D9%8A%D8%A7-%D9%88%D9%84%D8%A8%D9%86%D8%A7%D9%86
[13] https://www.alsumaria.tv/news/politics/470690/%d8%a7%d9%84%d8%b3%d9%88%d9%85%d8%b1%d9%8a%d8%a9-%d8%aa%d9%86%d8%b4%d8%b1-%d9%85%d9%82%d8%b1%d8%b1%d8%a7%d8%aa-%d8%a7%d9%84%d8%a8%d8%b1%d9%84%d9%85%d8%a7%d9%86-%d8%a7%d9%84%d8%ae%d8%a7%d8%b5%d8%a9-%d8%a8%d8%a3%d9%88%d8%b6%d8%a7%d8%b9-%d9%81%d9%84%d8%b3%d8%b7%d9%8a%d9%86?src=rss&utm_source=thewall360&utm_medium=rss-articles&utm_campaign=rss&utm_term=Rss#hathalyoum
[14] https://www.france24.com/ar/%D8%A7%D9%84%D8%B4%D8%B1%D9%82-%D8%A7%D9%84%D8%A3%D9%88%D8%B3%D8%B7/20231018-%D8%A7%D9%84%D8%AC%D9%8A%D8%B4-%D8%A7%D9%84%D8%A3%D9%85%D8%B1%D9%8A%D9%83%D9%8A-%D9%8A%D8%AD%D8%A8%D8%B7-%D9%87%D8%AC%D9%88%D9%85%D8%A7-%D8%A8%D8%B7%D8%A7%D8%A6%D8%B1%D8%AA%D9%8A%D9%86-%D9%85%D8%B3%D9%8A%D8%B1%D8%AA%D9%8A%D9%86-%D8%A7%D8%B3%D8%AA%D9%87%D8%AF%D9%81-%D9%82%D8%A7%D8%B9%D8%AF%D8%A9-%D8%B9%D9%8A%D9%86-%D8%A7%D9%84%D8%A3%D8%B3%D8%AF-%D8%A8%D8%A7%D9%84%D8%B9%D8%B1%D8%A7%D9%82
[15] https://baghdadtoday.news/233466-%D8%A7%D9%84%D8%B9%D8%B1%D8%A7%D9%82-%D9%8A%D8%B9%D9%84%D9%86-%D8%A7%D9%84%D8%AD%D8%AF%D8%A7%D8%AF-%D8%B1%D8%B3%D9%85%D9%8A%D8%A7-%D8%B9%D9%84%D9%89-%D8%B4%D9%87%D8%AF%D8%A7%D8%A1-%D9%85%D8%AC%D8%B2%D8%B1%D8%A9-%D9%85%D8%B3%D8%AA%D8%B4%D9%81%D9%89-%D8%A7%D9%84%D9%85%D8%B9%D9%85%D8%AF%D8%A7%D9%86%D9%8A.html#hathalyoum
[16] https://baghdadtoday.news/233234-%D8%A7%D9%84%D8%AC%D9%81%D8%A7%D9%81-%D9%8A%D9%8F%D8%AF%D8%AE%D9%84-%D8%AA%D8%B3%D8%B9-%D9%85%D8%AD%D8%A7%D9%81%D8%B8%D8%A7%D8%AA-%D8%A7%D9%84%D8%AF%D8%A7%D8%A6%D8%B1%D8%A9-%D8%A7%D9%84%D8%AD%D9%85%D8%B1%D8%A7%D8%A1-%D9%88%D8%AA%D8%B3%D9%88%D9%86%D8%A7%D9%85%D9%8A-%D8%A7%D9%84%D9%86%D8%B2%D9%88%D8%AD-%D9%8A%D9%84%D9%88%D8%AD-%D8%A8%D8%A7%D9%84%D8%A3%D9%81%D9%82.html
[17] https://aawsat.com/%D8%A7%D9%84%D8%B9%D8%A7%D9%84%D9%85-%D8%A7%D9%84%D8%B9%D8%B1%D8%A8%D9%8A/%D8%A7%D9%84%D9%85%D8%B4%D8%B1%D9%82-%D8%A7%D9%84%D8%B9%D8%B1%D8%A8%D9%8A/4607341-%D9%85%D8%A4%D8%AA%D9%85%D8%B1-%D9%85%D9%83%D8%A7%D9%81%D8%AD%D8%A9-%D8%A7%D9%84%D9%85%D8%AE%D8%AF%D8%B1%D8%A7%D8%AA-%D9%81%D9%8A-%D8%A7%D9%84%D8%B9%D8%B1%D8%A7%D9%82-%D9%88%D8%B2%D9%8A%D8%B1-%D8%A7%D9%84%D8%AF%D8%A7%D8%AE%D9%84%D9%8A%D8%A9-%D9%8A%D8%AD%D8%B0%D8%B1-%D9%85%D9%86-%D8%AA%D9%87%D8%AF%D9%8A%D8%AF%D9%87%D8%A7
[18] https://earthiq.news/archives/287876
[19] https://almaalomah.me/news/43638/security/%D8%A7%D9%84%D8%A7%D8%B3%D8%AA%D8%AE%D8%A8%D8%A7%D8%B1%D8%A7%D8%AA-%D8%A7%D9%84%D8%B9%D8%B3%D9%83%D8%B1%D9%8A%D8%A9-%D8%AA%D8%B7%D9%8A%D8%AD-%D8%A8%D8%AA%D8%B3%D8%B9%D8%A9-%D8%AF%D9%88%D8%A7%D8%B9%D8%B4-%D9%81%D9%8A-6-%D9%85%D8%AD%D8%A7%D9%81%D8%B8%D8%A7%D8%AA