تاک
هێرش دەكرێتە سەر بنكە سەربازییەكانی ئەمەریكا لە سوریا
چەكدارەكانی "موقاوەمەی ئیسلامی لە عێراق" لە
ڕاگەیەندراوێكدا ڕایانگەیاند، كە هێرشیان كردووەتە سەر بنكەیەكی سەربازی ئەمەریكی
لە باشووری ڕۆژهەڵاتی سوریا.
ئەم چەكدارانە لە ڕێگەی دوو فڕۆكەی بێفڕۆكەوانەوە بنكەی
تەنەفیان كردووە بە ئامانج. ئەم هێرشە بەشێكە لەو زنجیرە هێرشەی كە ماوەیەك هێزە
لەبرییەكانی ئێران لە دژی هێزەكانی ئەمەریكا لە سوریا و عێراق ئەنجامی دەدەن.
ئەمەریكا میلیشیاكانی سەر بە سوپای پاسدان بە ئەنجامدانی هێرشەكان تۆمەتبار دەكات. [1]
ئەمەریكا داوا لە سوریا دەكات كە سنوورێك بۆ هێزە
لەبرییەكانی ئێران دابنێت
باڵیۆزی ئەمەریكا لە نەتەوە یەكگرتووەكان لیندا تۆماس
گرینفیڵد ڕژێمی سوریا بەوە تۆمەتبار دەكات كە ڕێگەی بە ئێران و هیزە لەبرییەكان،
حزبوڵڵا وەك نموونە، داوە كە فڕۆكەخانە نێودەوڵەتییەكانی ئەو وڵاتە بۆ مەبەستی
سەربازی بەكار بهێنن.
گرینفیڵد داوای سوریا كرد كە "واز لە یاریكردن بە
كارتی قوربانییەكان بهێنێت" و داوای لە دیمەشق كرد كە ڕێگە نەدات ئێران لە
ڕێگەی خاكی سوریاوە مەترسی لەسەر ئاسایشی وڵاتانی دراوسێی سوریا دروست بكات.[2]
پنتاگۆن: هێزەكانمان لە سوریا و عێراق 27 جار هێرشیان
كراوەتەسەر
جەنراڵ پات ڕایدەر ڕایگەیاند، كە بنكە سەربازییەكانی
ئەمەریكا لە سوریا و عێراق لە ماوەی ڕابردوودا زیاتر لە 27 جار لە ڕێگەی درۆن و مووشەكەوە
كراونە ئامانج. پەنجەی تۆمەت بۆ هێزە لەبرییەكانی ئێران ڕادەكێشرێت و لە بەرامبەر
ئەم هێرشانەدا ئەمەریكا بارەگای ئەو هێزانەی كردووەتە ئامانج.[3]
“مقاوەمەی ئیسلامی” رایگەیاند کە هێرشیان کردووەتە سەر
بنکەیەکی ئەمریکا لە سووریا
میلیشیای “مقاوەمەی ئیسلامی لە عێراق” رایگەیاند کە هێرشێکیان
بۆ سەر بنکەی تەنەفی ئەمریکی لە باشووری رۆژهەڵاتی سووریا ئەنجامداوە.
ئەم هێرشە 28ەمین هێرشە دوای ئەوەی پنتاگۆن رایگەیاند
کە پێگەکانی هاوپەیمانی نێودەوڵەتی لە ماوەی دوو هەفتەی رابردوودا 27 جار لەلایەن
گروپە دڵسۆزەکانی ئێرانەوە کەوتوونەتە بەر هێرش.
گرووپی “مقاوەمەی ئیسلامی لە عێراق” رایگەیاند کە بە
دوو فڕۆکەی بێفڕۆکەوان بنکەی تەنەفیان کردووەتە ئامانج.
ئەم هێرشە گوماناوییە بەشێکە لە زنجیرەیەک هێرش کە لەلایەن
هەمان گروپەوە بۆ سەر پیگە و شوێنەکانی هاوپەیمانی نێودەوڵەتی دژی داعش لە سووریا
و عێراق لە سەرەتای سەرهەڵدانی جەنگەوە لە غەززە دەستیپێکردووە.
ئەمریکا میلیشیاکانی سەر بە سوپای پاسدارانی ئێران بە
ئەنجامدانی ئەو کارە تۆمەتبار دەکات.
“مقاوەمەی ئیسلامی لە عێراق” لە راگەیەنراوێکدا لە رێگەی ناسێنەرەکانیەوە
گوتیان، “هێرشەکەی سەر تەنەف راستەوخۆ ئامانجەکانی پێکاوە”، بەبێ ئەوەی سروشتی زیانەکان
ئاشکرا بکات.[4]
میدیای فەرمی حكومەتی سوریا: ئەمەریكا نەوتی سوریا
"دەدزێت"
میدیای فەرمی سوریا (سانا) هێزەكانی ئەمەریكای نێو سوریا
بە "دزینی نەوتی" ئەو وڵاتە تۆمەتبار دەكات.
بەپێی ڕاپۆرتێكی (سانا) بێت، هێزەكانی ئەمەریكا
"بەردەوامن لەسەر دزینی سەرچاوە سروشتییەكانی ئەو ناوچانەی كە داگیریان
كردووە".
میدیا فەرمییەكەی حكومەتی سوریا بە پشتبەستن بە
سەرچاوەكانی ئەوەی زانیوە كە (1/11/ 2023) هێزەكانی ئەمەریكا 35 تەنكەری نەوتیان
لە سوریا وە بۆ بنكە سەربازییەكانیان لە نێو عێراق گواستووەتەوە.[5]
ڕوسیا ئیسرائیل لە هێرشەكانی بۆ سەر سوریا ئاگادار
دەكاتەوە
وەزیری دەرەوەی ڕوسیا لە پەیوەندییەكی تەلەفۆنیدا لەگەڵ
هاوتا سورییەكەی فەیسەڵ میقداد، پاش تاوتوێكردنی جەنگەكەی غەزە، نیگەرانی خۆی
دەربڕی و ڕایگەیاند كە گواستنەوەی جەنگەكەی نێوان حەماس و ئیسرائیل بۆ سوریا
"جێی قبووڵكردن نییە". [6]
توركیا هێزی سەربازی زیاتر بۆ بنكەكانی لە سەرێ كانی
دەنێرێت
دوای داگیركردنی سەرێ كانی لەلایەن توركیا و هێزە
لەبرییەكانییەوە ئەنقەرە چەندین بنكەی سەربازی لە سەرێ كانی دامەزراندووە.
سەرچاوەیەكی سەربازی باس لەوە دەكات كە توركیا كاروانێكی
سەربازی نوێی كە لە حەوت زرێپۆش پێكهاتبوو ناردووە بۆ بنكە سەربازییەكانی لە سەرێ
كانی.
بەپێی ئەم سەرچاوە سەربازییە بێت، توركیا لە ئۆكتۆبەردا
پێنج جار هێزی زیاتر ڕەوانەی سەرێ كانی كردووە. هەمان سەرچاوە باس لەوە دەكات كە
زیادكردنی هێز و جموجۆڵەكانی توركیا جۆرێكە لە ئامادەكاری ئەو وڵاتە بۆ پلانێك كە
تا ئێستا سیماكانی دیار نین. [7]
توركیا لە دێرك ڕێكخەری پەیوەندییەكانی هێزەكانی سوریای
دیموكرات تیرۆر دەكات
توركیا لە ڕێگەی هێرشێكی درۆنییەوە لە شاری دێرك لە
ڕۆژئاوای كوردستان (مەحەمەد شبلی) ڕێكخەری پەیوەندییەكانی هێزەكانی سوریای
دیموكرات و هاوپەیمانی نێودەوڵەتی لە ماڵەكەی خۆیدا تیرۆر كرد. شبلی لە ساڵی
2014ەوە لە ژووری ئۆپەراسیۆنەكان وەك ڕێكخەری پەیوەندییەكان لەگەڵ هاوپەیماناندا
كار دەكات. [8]
هەواڵگری توركیا چەند دەستگیراوێك لە عەفرینەوە
دەگوازێتەوە بۆ توركیا
هەواڵگری توركیا 9 كەس لە زیندانی عەفرینەوە بۆ نێو خاكی
توركیا دەگوێزێتەوە. ئەم 9 كەسە بە تۆمەتی كاركردن بۆ پارتی كرێكارانی كوردستان
دەستگیركراون و لە ڕێگەی دەروازەی سنووری (ئەلحەمام)ەوە بۆ توركیا براون. لە نێو
دەستگیركراوەكاندا دوو ژن بوونییان هەیە.[9]
نەتەوە یەكگرتووەكان: جەنگەكەی نێوان حەماس و ئیسرائیل
گوازراوەتەوە بۆ سوریا
نێردەی تایبەتی نەتەوە یەكگرتووەكان بۆ سوریا گیر
پێدەرسن ڕایگەیاند، كە جەنگەكەی نێوان حەماس و ئیسرائیل گوازراوەتەوە بۆ سوریا و
ناسەقامگیری ئەو وڵاتە زیاتر كردووە.
بەبۆچوونی پێدەرسن، گۆاستنەوەی جەنگەكەی غەزە بۆ نێو
خاكی سوریا بەنزینی زیاتر دەكات بەسەر ئەو ئاگرەدا كە ماوەی دوانزە ساڵە لە سوریا
تەڕو وشك وەك یەك دەسوتێنێت.[10]
ئازەربایجان: یانزە هاووڵاتیمان لە كەمپەكانی سوریا
وەرگرتووەتەوە
وەزارەتی دەرەوەی ئازەربایجان ڕایگەیاند، كە باكۆ 11 هاووڵاتی
ئازەری لە سوریاوە بۆ ئازەربایجان گەڕاندووەتەوە.
ئەو هاووڵاتییە ئازەرییانەی كە ئازەربایجان گەڕاندوونییەوە
بۆ وڵاتەكەی بریتین لە 9 منداڵ و 2 ژن. سەرەتا ئەم هاووڵاتییە ئازەرییانە لە
سوریاوە براون بۆ توركیا و لەوێشەوە، پاش بشكنینی پێویست، گەڕێنراونەوە بۆ وڵاتەكەیان.[11]
[1] https://npasyria.com/krd/25214/
[2] https://www.thenationalnews.com/world/us-news/2023/10/30/us-calls-on-damascus-to-restrain-iran-backed-militias-in-syria/
[3] https://www.voanews.com/a/pentagon-27-attacks-target-us-forces-in-iraq-syria/7335584.html
[4] https://npasyria.com/krd/25305/
[5] https://sana.sy/en/?p=319672
[6] https://www.tasnimnews.com/en/news/2023/11/01/2981471/russia-warns-israel-about-attacks-on-syria
[7] https://npasyria.com/krd/25214/
[8] https://npasyria.com/krd/25109/
[9] https://npasyria.com/krd/25302/
[10] https://timesofindia.indiatimes.com/world/us/a-un-envoy-says-the-israel-hamas-war-is-spilling-into-syria-which-already-has-growing-instability/articleshow/104842049.cms
[11] https://news.az/news/azerbaijan-repatriates-11-more-citizens-from-syria
#سوریا
بینێرە لە ڕێگەی