تاک
دادگای نێودەوڵەتی: دەبێت سوریا واز لە ئەشكەنجەدانی هاووڵاتییەكانی بهێنێت
دادگای نێودەوڵەتی لە لاهای لە 16ی تشرینی دووەم بڕیارێكی كاتی دەربارەی سوریا دەركرد و داوای لە دیمەشق كرد ئەوەی لە توانایدایە بكات بۆ ڕێگریكردن لە ئەشكەنجەدان.
ئەم بڕیارەی دادگای نێودەوڵەتی دوای ئەوە هات كە هۆڵەندا و كەنەدا سكاڵایان لەسەر سوریا تۆماركرد و ئەو وڵاتەیان بە ئەشكەنجەدانی هاووڵاتییانی خۆی تۆمەتبار كرد.
هیومان ڕایتس وۆچ پێشوازی لە بڕیارەكەی دادگای نێودەوڵەتی كرد و جەختی لەوە كردەوە كە جێبەجێكردنی بڕیارەكە هەزاران كەس لە مردن ڕزگار دەكات.[1]

درۆنەكانی توركیا سێ ئۆتۆمبیل لە ڕۆژئاوای كوردستان دەكەنە ئامانج
بەپێی ڕاپۆرتێكی ڕوانگەی سوری بۆ مافەكانی مرۆڤ بێت، ڕۆژی چوار شەممە (22/ 11/2023) درۆنەكانی توركیا سێ ئۆتۆمبیل لە سێ كات و سێ شوێنی جیاواز لە قامیشلۆ دەكەنە ئامانج.
داتاكانی ڕوانگەی سور بۆ مافەكانی مرۆڤ ئەوە نیشان دەدەن كە لە سەرەتای ئەم ساڵەوە توركیا 101 هێرشی درۆنی لە ڕۆژئاوای كوردستان ئەنجام داوە و بەم هۆیەوە 82 كەس گیانیان لەدەست داوە و 90 كەسی تریش بریندار بوون.  بەپێی داتاكانی ڕوانگەی سوری بێت، لە نێو كوژراوەكاندا 17 هاووڵاتی مەدەنی بوونییان هەیە.[2]

كۆمپانیای مایەرسك كارەكانی لە سوریا ڕادەگرێت
كۆمپانیای مایەرسكی دانیماركی، كە لە بواری گواستنەوەی شتومەكدا كار دەكات، ڕایگەیاند كە لە سەرەتای مانگی داهاتووەوە (لە 1ی 12) كارەكانی لە سوریا ڕادەگرێت و چی تر كۆمپانیاكە ناتوانێت بار بۆ سوریا بگوێزێتەوە، یان لە سوریاوە بار بۆ وڵاتانی تری ببات.
بەپێی ڕاگەیانراوەكەی كۆمپانیای مایەرسك (Maersk)، هۆكاری ڕاگرتنی كارەكانی لە سوریا بۆ گەمارۆكانی سەر سوریا دەگەڕێتەوە.[3]

"ئەمەریكا بە دوای پاساوێكدا دەگەڕێت تا سوریا بەجێبهێڵێت"
ئەڵێكسی چیپا (Alexey Chepa) پەرلەمانتاری ڕوسی لەو باوەڕەدایە كە ئەمەریكا بە دوای پاساوێكدا دەگەڕێت بۆ ئەوەی سوریا و عێراق بەجێبهێڵێت.
بە بڕوای ناوبراو، دوای دەرچوونی سوپای ئەمەریكا لەم دوو وڵاتە، سوریا و عێراق ڕووبەڕووی هەمان بارودۆخی ئەفغانستان دەبنەوە.
ئەلێكسی جەختی لەوە كردەوە، ڕوسیا ڕۆڵی دەبێت لە پڕكردنەوەی ئەو بۆشاییەی كە بە هۆی چوونەدەرەوەی ئەمەریكاوە لە عێراق و سوریا دروست دەبێت.
ناوبراو باس لەوە دەكات كە بڕیارێكی لەم جۆرە كاریگەری لە سەر هەڵبژاردنەكانی نێوخۆی ئەمەریكا دەبێت.[4]

سەرەڕای زیادبوونی هێرشەكان، ئەمەریكا سوریا جێناهێڵێت
هێزەكانی ئەمەریكا لە سوریا لە ماوەی ڕابردوودا زیاتر لە پەنجا جار هێرش كراوەتە سەریان و بەهۆی ئەم هێرشانەوە نزیكەی 56 سەرباز بریندار بووە.
هێزە لەبرییەكانی ئێران لە سوریا تۆمەتبارن بە ئەنجامدانی ئەم جۆرە هێرشانە و ئامانجیان دروستكردنی فشارە لەسەر واشنتۆن بۆ ئەوەی هێزەكانی لە سوریا بكێشێتەوە، بەڵام ئاماژەكان ئەوە نیشان دەدەن كە واشنتۆن لە ئێستادا، سەرەڕای زیادبوونی هێرشەكان، بە نیاز نییە هێزەكانی لە سوریا بكێشێتەوە.[5]

حزبوڵڵای لوبنانی هێزی زیاتر دەنێرێت بۆ نزیك بەرزاییەكانی جۆڵان
بەپێی ڕاپۆرتێكی ڕوانگەی سوری بۆ مافەكانی مرۆڤ بێت، حزبوڵڵای لوبنانی نزیكەی 700 چەكداری لە نزیك بەرزاییەكانی جۆڵان لە دیوی سوریا جێگیر كردووە.
ئەم چەكدارانەی حزبوڵڵای لوبنانی لە ڕاپۆرتەكەدا وەك "هێزێكی دەستەبژێر" ناویان هاتووە و لەلایەن سوپای پاسدارانی ئێرانییەوە مەشقیان پێكراوە.
ئامانجی حزبوڵڵای لوبنانی لە جێگیركردنی ئەم چەكدارانە لە نزیك سنوورەكانی ئیسرائیل لە سوریا دروستكردنی فشارە لەسەر ئیسرائیل.[6]


[1] https://countervortex.org/blog/world-court-censures-syria-for-torture/
[2] https://www.syriahr.com/%d9%81%d9%8a-%d8%a7%d8%b3%d8%aa%d9%87%d8%af%d8%a7%d9%81%d9%8a%d9%86-%d9%85%d8%aa%d8%b2%d8%a7%d9%85%d9%86%d9%8a%d9%86-%d9%85%d8%b3%d9%8a%d8%b1%d8%a9-%d8%aa%d8%b1%d9%83%d9%8a%d8%a9-%d8%aa%d8%b3%d8%aa/692072/
[3] https://www.hellenicshippingnews.com/maersk-winds-down-operations-in-syria/
[4] https://www.rudaw.net/english/world/21112023
[5] https://www.newarab.com/analysis/will-iran-linked-attacks-force-us-troops-out-syria
[6] https://www.newarab.com/news/hezbollah-deploys-700-fighters-near-syrias-golan-heights