تاک
مەزڵوم عەبدی: پێمان باش
نییە ڕۆژئاوای كوردستان ببێت بە شوێنی یەكلاكردنەوەی ململانێكانی نێوان واشنتۆن و
تاران
فەرماندەی گشتی هێزەكانی
سوریای دیموكرات، مەزڵوم عەبدی، لە چاوپێكەوتنێكیدا لەگەڵ ئەلمۆنیتەری ئەمەریكی
باس لەوە دەكات كە "خەڵكەكەی نایەوێت ناوچەكەیان ببێتە گۆڕەپانی
یەكلاكردنەوەی ملمانێكانی نێوان ئەمەریكا و هێزە لەبرییەكانی ئێران".
ناوبراو ئەوەی ئاشكرا كرد كە
بەم دواییانە هێزە لە برییەكانی ئێران "دەستیان كردووە بە ئامانجگرتنی بارەگا
سەربازییەكانی هێزەكانی سوریای دیموكرات".
عەبدی نەبوونی سەقامگیری لە
ڕۆژهەڵاتی ناوەڕاست بۆ چارەسەرنەكردنێكی "دادپەروەرانەی" كێشەی كورد و
فەڵەستین دەگێڕێتەوە.[1]
قاسم ئەعرەجی: دانەخستنی
كەمپی هۆل مەترسی لەسەر ئاسایشی عێراق دروست دەكات
ڕاوێژكاری ئاسایشی نیشتمانی
عێراق، قاسم ئەعرەجی ڕایگەیاند، كە داخستنی كەمپی هۆل لە ڕۆژئاوای كوردستان، كە
هەزاران كەسی تێدا بە تۆمەتی داعشبوون زیندانی كراوە، ئامانجێكی ستراتیژی عێراقە.
ناوبراو هۆكاری ئەمەی بۆ
ئەوە گێڕایەوە كە مانەوە و دانەخستنی ئەم كەمپە ئاسایش و ئاشتیی ناوچەكە دەخاتە
مەترسییەوە.
ناوبراو بۆ داخستنی كەمپەكە
داوای هاوكاری لە وڵاتانی جیهان كرد.[2]
نێردەی ڕوسیا لە نەتەوە
یەكگرتووەكان: ئەمەریكا لە سوریا دەستبەرداری جەنگی داعش بووە
نێردەی هەمیشەیی ڕوسیا لە
نەتەوە یەكگرتووەكان، ڤاسیلی نیبنزیا ڕایگەیاند، كە ئەمەریكا و هاوپەیمانەكانی لە
سوریا بەشێوەیەكی نیمچە هەمیشەیی دەستبەرداری جەنگی داعش و ئەلقاعیدە بوون.
ناوبراو ئەوەشی ڕاگەیاند، كە
دەستوەردانەكانی وڵاتانی ڕۆژئاوا لە سوریا بە پاساوی جەنگ دژی داعش
"سەقامگیری ئەو وڵاتەی تێكداوە".
ئەو وڵاتانی ڕۆژئاوا بەوە
تۆمەتبار دەكات كە داعشیان بۆ بەرژەوەندییەكانی خۆیان "بەكارهێناوە".[3]
داعش: ململانێی نێوان
هێزەكانی سوریای دیموكرات و چەكدارەكانی خێڵە عەرەبییەكان "ململانێیە لەسەر
بەرژەوەندی"
داعش بۆ ماوەیەكی زۆر بێدەنگ
بوو دەربارەی ململانێكانی نێوان هێزەكانی سوریای دیموكرات و چەكدارە خێڵەكییەكانی
دێرەزوور، ئەم ڕێكخراوە بێدەنگی شكاند و جەنگەكە بە جەنگی "بەرژەوەندی" ناو
دەبات.
داعش داوا لە "موسڵمانانی
ئەو ناوچانە دەكات كە خۆیان لەو جۆرە جەنگە بپارێزن و نەبن بەبەشێك لێی".
هۆكاری ئەم بانگەوازەی داعش
بۆ ئەوە دەگەڕێتەوە كە ڕێكخراوەكە جەنگەكە بە "جەنگی نەفامی/ جاهیلی"
ناوزەد دەكات.[4]
جەنگ لە نێوان هێزەكانی
سوریای دیموكرات و چەكدارە خێڵەكییەكان دەست پێ دەكاتەوە
هێزە خێڵەكییەكان لە
شارۆچكەی شحێلی سەر بە پارێزگای دێرەزوور لە ڕێگەی ئاڕ بی جی-یەوە پەلاماری چەند
خاڵێكی سەربازی هێزەكانی سوریای دیموكرات دەدەن. بەپێی ڕوانگەی سوری بۆ مافەكانی
مرۆڤ بێت، یەكێك لە چەكدارە خێڵەكییەكان كوژراوە.[5]
میت بەرپرسێكی هێزەكانی
سوریای دیموكرات لە ڕۆژئاوای كوردستان تیرۆر دەكات
دەزگای هەواڵگری توركیا
(میت) لە ئۆپەراسیۆنێكی سنووربڕدا لە ڕۆژئاوای كوردستان موتلو كاجار (Mutlu Kacar)ی تیرۆر
كردووە.
بەپێی ئەو سەرچاوە ئەمنییە
بێت كە قسەی بۆ ئاژانسی ئەنادۆڵ كردووە، میت ناوبراوی لە كۆبانێ تیرۆر كردووە.
ئەم ئۆپەراسیۆنەی میت دوای
ئەوە هات كە میت لە ڕێگەی سیخوڕەكانییەوە شوێنی مانەوەی ئەو بەرپرسەی هێزەكانی
سوریای دیموكراتی ئاشكرا كردووە.[6]
گەشتوگوزاری ئایینی هەزاران
عێراقی بەرەو سوریا ڕادەكێشێت
هەزاران عێراقی لە پێكهاتەی
شیعە بە مەبەستی سەردانی ناوچە پیرۆزەكانی سوریا سەردانی ئەو وڵاتە دەكەن.
زیادبوونی ژمارەی
سەردانیكەرانی عێراقی دوای ئەوە هات كە حكومەتی سوریا بە مەبەستی زیادكردنی
داهاتەكانی كارئاسانییەكی زۆری بۆ عێراقییەكان كردووە.
سەردانی سوریا لە لایەن
شیعەكانی عێراقەوە مەترسی لەلای هەندێك، بەتایبەتی سونەكانی سوریا دروست كردووە و
ئەوان هاتنی شەپۆلی زیارەتكارانی شیعی وەك هەنگاوێك بۆ بەشیعەكردنی سوریا دەبینن.[7]
62 كەس لە ناوچەكانی ژێر
دەسەڵاتی ئۆپۆزسیۆنی سوری هەوڵی خۆكوشتنیان داوە
ئاماری ڕێكخراوەكانی مافی
مرۆڤ ئەوە نیشان دەدات كە لە سەرەتای ئەم ساڵەوە 62 كەس لە ناوچەكانی ژێر كۆنترۆڵی
چەكدارەكانی سەر بە ئۆپۆزسیۆنی سوری، هەوڵی خوكوشتنیان داوە.
بەپێی ئامارەكە بێت، زۆربەی
ئەو كەسانەی كە هەوڵی خۆكوشتنیان داوە لە ڕەگەزی مێ-ن و هۆكاری ئەمەش، بەپێی
ڕێكخراوەكانی بواری مافەكانی مرۆڤ بێت، بۆ پاڵپشتی نەكردنی ژنانی ئەو ناوچانە
دەگەڕێتەوە.[8]
[1] https://www.al-monitor.com/originals/2023/11/syrian-kurdish-commander-we-dont-want-become-battleground-between-us-iran
[2] https://www.rudaw.net/english/middleeast/iraq/281120231
[3] https://almaalomah.me/news/48448/global
[4] https://www.alquds.co.uk
[5] https://www.syriahr.com/
[6] https://www.aa.com.tr/en/turkiye/turkish-intelligence-neutralizes-local-pkk-ypg-terrorist-ringleader-in-northern-syria/3065765
[7] https://www.alarab.co.uk
[8] https://www.alhurra.com/syria/2023/11/28
#سوریا
بینێرە لە ڕێگەی