وەرگێڕانی: تاک

پلانەکە دوای دامەزراندنی هاوپەیمانی سێ قۆڵی لە نێوان سەدر و سوننە و پارتی دیموکراتی کوردستان دەستی پێ کرد، ئەو کاتە لایەنەکانی چوارچێوەى هەماهەنگى چوونە ماڵی مالیکی و کاری خۆیان ڕادەستی ئەو کرد، ئەویش ئەو مەرجەی دانا کە تا کۆتایی شوێنی بکەون و پاشەکشە نەکەن، پاشان مالیکی پەناى بردە بەر سیاسەتى (سێ بەشی پەکخەر) لە پەرلەمان، کە مەبەست لێی دابینکردنى مافی پێکهاتەى شیعەکان بوو لە پەرلەمان بەو پێیەى زۆرینە بوون، دواتر سەدر کشایەوە و سوننە و کوردەکانیش پاشەکشەیان کرد تا دواتر دەست بخەنە ناو دەستى چوارچێوەى هەماهەنگى لە بەرامبەر چەند بەڵێنێکی پووچدا، کە بەهۆی ئەزموونی پێشوویان لەگەڵ چوارچێوەدا، تەواو دڵنیابوون بەدەست ناهێنرێت، بەڵام ئەوان بەوە ڕازى بوون لە بەرامبەر بەدەستهێنانی پشکی خۆیان لە پۆستەکان و بودجەی دەوڵەت!
لە هەمان کاتدا مالیکی پلانی تۆڵەسەندنەوەی دادەڕشت و تەنیا بە دروستکردنى حکومەتى چوارچێوەى هەماهەنگى پەسەندى نەکرد، بەڵکو بڕیاری دا سزای سوننە و کوردەکان بدات بەم شێوەیە:
سەرەتا هەموو سیاسەتمەدارە سوننە داواکراوەکانى بانگهێشتی دەسەڵاتی دادوەری کرد بۆ یەکلاکردنەوەى دۆسیەکانیان لە بەرامبەر کردنەوەی بەرەیەک لە دژی حەلبوسی و خەنجەر بۆ دروستکردنی بەدیلێکی سوننە، کە لایەنگریی ئێران بکات و گوێ بەفەرمانى چوارچێوەى هەماهەنگی بێت، بەم شێوەیە تەواوى ئەوانەی داواکراو بوون، بە ڕێکەوتنەکە ڕازیبوون لە بەرامبەر گەڕانەوە بۆ دەسەڵات، تەنانەت ئەگەر لەسەر حسابی بەرژەوەندی هاوپەیمانەکانیان بێت.
لە ئێستادا پلانەکە بە تەواوەتی جێبەجێ دەکرێت و دوورخستنەوەی حەلبوسی و گەڕانەوەی ڕکابەرە داواکراوەکان تەنیا ئەڵقەی یەکەمی ئەو کودەتا نەرمەیە کە مالیکی پلانی بۆ داناوە.
هەنگاوی دواتر کۆنترۆڵکردنی ئەنجومەنی پارێزگاکان و دانانی پارێزگاری دڵسۆزە بۆ چوارچێوەی هەماهەنگی لە موسڵەوە تا بەسرە، تاکە شتێک کە بەرامبەر ئەم پلانە دەوەستێتەوە بانگەوازی بایکۆتی سەدر و تشرینى-یەکانە، هەر بۆیە چوارچێوەى هەماهەنگى سوورە لەسەر ئەوەى هەڵبژاردن لە کاتى خۆیدا بکرێت و دوانەخرێت تا بتوانن سوود لە بایکۆت وەربگرن لە بەرژەوەندى خۆیان، هەر وەک چۆن سوودیان لە کشانەوەى ڕەوتى سەدر وەرگرت لە پەرلەمان.
ئایا مالیکی دەتوانێت بەردەوام بێت لەسەر جێبەجێکردنى پلانەکەی بۆ دەستگرتن بەسەر ئەنجومەنی پارێزگاکاندا، لەوانە موسڵ، ئەنبار، سەڵاحەدین و دیالە، یان ڕۆژانی داهاتوو پڕن لە شتى چاوەڕوان نەکراو؟
سەرچاوە:
https://twitter.com/alialjabiri/status/1731256329891664228?s=48&t=dVLetPKCO3O8JXa_XjZiTA