تاک
بەشار ئەسەد: هۆڵۆكۆست درۆیەك بوو بۆ بوونیادنانی
دەوڵەتی ئیسرائیل بەكارهێنرا
سەرۆكی سوریا بەشار ئەسەد لە وتارێكیدا گومان
دەخاتە سەر ڕاستی هۆڵۆكۆست و باس لەوە دەكات "هیچ بەڵگەیەك بوونی نییە ئەوە
بسەلمێنێت كە شەش ملیۆن جولەكە لە هۆڵۆكۆستدا كوژراون".
بە بۆچوونی سەرۆكی سوریا، ئەم پرسە "بە
سیاسی كرا و بۆ ساختەكردنی ڕاستییەكان" و دروستكردنی دەوڵەتێك بۆ جولەكەكان
لە فەڵەستین بەكارهێنراوە.[1]
ئەنجومەنی سوریای دیموكرات لەیلا قارەمان و
مەحمود میسلەتی بە هاوسەرۆك هەڵبژارد
ئەنجومەنی سوریای دیموكرات، باڵی سیاسی هێزەكانی
سوریای دیموكرات، لە چورەمین كۆنفرانسی خۆیدا كە لە ڕەقە بەڕێوەچوو دوو هاوسەرۆكی
نوێی بۆ ئەنجومەنەكە هەڵبژار.
لە كۆنفرانسەكەدا هەر یەك لە لەیلا قارەمان و
د.مەحمود میسلەت وەك هاوسەرۆكی نوێی ئەنجومەنەكە هەڵبژێردران و جێگەی ئامینە عومەر
و ڕیاز زیرار-یان گرتەوە. د. مەحمود میسلەت بە نەتەوە عەرەبە و لە خێڵی جبورە.[2]
توركیا فەرماندەیەكی دیاری ڕۆژئاوای كوردستان
تیرۆر دەكات
توركیا ڕایگەیاند كە فەرماندەیەكی سەربازی
كوردی بە ناوی شێروان حەسەن لە ڕۆژئاوای كوردستان تیرۆر كردووە. شێروان، كە
ئەندامی ئەنجومەنی سەربازی دێرەزوور بوو، پاش گەڕانەوەی لە كۆبوونەوەیەك لەگەڵ هێزەكانی
هاوپەیمان لەلایەن هەواڵگری توركیاوە (میتەوە) لە دێرەزوور دەكرێتە ئامانج و تیرۆر دەكرێت.
هێزەكانی سوریای دیموكرات لە ڕاگەیەنراوێكدا
كوژرانی ناوبراویان پشتڕاست كردەوە و ئەو
لایەنەیان بە تیرۆركردنەكە تۆمەتبار كرد كە "خێری بۆ ناوچەكە ناوێت".[3]
مانگی سوری كوردی نەخۆشخانەیەك بۆ
چارەسەركردنی شێرپەنجە لە ڕۆژئاوای كوردستان دەكاتەوە
مانگی سوری كوردستان (هەیڤا سورا كوردستانێ)
یەكەم نەخۆشخانەی چارەسەری شێرپەنجەی لە قامیشلۆ كردەوە. ئەم نەخۆشخانەیە ژێرخانی
ئەندروستی لە ڕۆژئاوای كوردستان بەهێز دەكات و خزمەتگوزارییەكانی بە بێبەرانبەر
پێشكەش بە توشبووانی شێرپەنجە دەكات.
بەپێی وتەی هاوسەرۆكی مانگی سوری كوردستان
دڵگەش عیسا بێت، مانگی سوری كوردستان ساڵانێكە كار لەسەر كردنەوەی ئەم جۆرە
نەخۆشخانەیە دەكات و پلانیان هەیە لە داهاتوودا بەشەكانی سوتاوی و تالاسیما لە
نەخۆشخانەكە بكەنەوە.[4]
ئایا ئەمەریكا ئامادەیە بۆ پاراستنی كورد لە
عێراق و سوریا دەستوەردان بكات؟
سیروان كەجۆ لە نوێترین شیكاریدا باس لەوە
دەكات كە هەرێمی كوردستان لە عێراق و
سوریا دەرفەتی بەهێزبوونی لە بەردەستایە و دەتوانێت، ئەگەر ژیرانە مامەڵە بكات،
لەسەر پێكانی خۆی بووەستێت.
ئەو ئاماژە بەوە دەكات كە ئەم دوو هەرێمە
كوردییە دەستكردی ئەمەریكان و تەنها ئەمەریكا دەتوانێت بیانپارێزێت و بەرگرییان
لێبكات. كەجۆ لەو باوەڕەدایە مانەوەی هەرێمە كوردییەكان لە بەرژەوەندی
ئەمەریكادایە و هەربۆیە هانی ئەمەریكا دەدات ڕێگری بكات لە كەوتنی كوردستانی عێراق
و سوریا. [5]
توركیا و ئێران تاوتوێی دۆخی سوریا دەكەن
ڕاوێژكاری وەزیری دەرەوەی ئێران عەلی ئەسغەر
خاجی و جێگری وەزیری دەرەوەی توركیا ئەحمەد ئەڵدز كۆبوونەوە و تاوتوێی دۆخی سیاسی
سوریایان كرد.
لە كۆبوونەوەكەدا باس لە كۆبوونەوەكانی
داهاتووی نێوان توریكا و سوریا و ڕوسیا و ئێران كراوە و بەرقەراربوونی ئاشتییەكی
هەمیشەیی لە سوریا بە پێویست دەزانن. [6]
كۆنگریس 156 ملیۆن دۆلار بۆ ڕووبەڕووبوونەوەی
داعش لە سوریا تەرخان دەكات
كۆنگرێسی ئەمەریكی بڕی 156 ملیۆن دۆلاری
ئەمەریكی بۆ ڕووبەڕووبوونەوەی داعش و هاوكاری هێزە هاوپەیمانەكانی ئەمەریكا لە
سوریا تەرخان كرد.
ئەم بڕە پارەیەی كە بۆ ڕووبەڕووبوونەوەی داعش
لە سوریا تەرخان كراوە، بەراورد بەو بڕەی ساڵی ڕابردوو، نۆ ملیۆن دۆلار كەمی
كردووە.
تەرخانكردنی ئەم بڕە پارەیە لەلایەن
كۆنگرێسەوە ئەوە نیشان دەدات كە واشنتۆن، سەرەڕای فشارەكانی توركیا، ئامادە نییە
دەستبەرداری هێزەكانی سوریای دیموكرات بێت.[7]
وەزیرانی دەرەوەی سوریا و ئێران پەیوەندییەكی
تەلەفۆنی ئەنجام دەدەن
وەزیری دەرەوەی سوریا فەیسەڵ میقداد و هاوتا
ئێرانییەكەی ئەمیر عەبدوڵڵاهیان پەیوەندییەكی تەلەفۆنی ئەنجام دەدەن و جگە لە
بارودۆخی سوریا تاوتوێی جەنگی غەزەش دەكەن.
هەر دوو لا لە پەیوەندییە تەلەفۆنییەكەیاندا
داوایان كرد كە ڕێگە بدرێت هاوكارییە مرۆییەكان بە دانیشتوانی غەزە بگات.[8]
پەروەردە لە گوندەكانی دەوروبەری عەفرین
بارمتەی تۆپبارانی پێشبینینەكراوە
بەهۆی یەكتر بۆردوومانكردنەوە بەشێك لە
منداڵانی گوندەكانی دەوروبەری عەفرین- بە تایبەتی ئەو گوندانەی كە نزیك هێڵی
بەركەوتنن (تەماسن)- ناتوانن بچنە قوتابخانە و كەسوكارەكەیان بە مەبەستی پاراستنی
گیانیان ئامادەنین منداڵەكانیان بنێرن بۆ قۆتابخانە.
هەركاتێك لایەنە نەیارەكان یەكتر تۆپباران
بكەن، ئەوا ئەم یەكتر تۆپبارانكردنانە لەلایەكەوە ترس دروست دەكات و لەلایەكی
ترەوە دەرگای قوتابخانەكان لە بەشێك لە گوندەكانی عەفرین بۆ ماوەی چەند ڕۆژێك
دادەخات. [9]
هێزەكانی سوریای دیموكرات لە ڕەقە دەست بەسەر
120 كیلۆگرام مادەی هۆشبەردا دەگرن
هێزەكانی سوریای دیموكرات ئاشكرایان كرد كە
هێزەكانی دیسپلینی سەربازی لە شاری ڕەقە توانیویانە دەست بەسەر 120 كیلۆگرام مادەی
هۆشبەر لە جۆری حەشیشدا بگرن.
ئەم هێزە لە شاری ڕەقە هەڵیكوتاوەتە سەر
ماڵێك و توانیوێتی بازرگانێكی مادەی هۆشبەر دەستگیر بكات و دەستیش بەسەر 120 كیلۆگرام حەشیشدا بگرێت. [10]
[1] https://www.timesofisrael.com/syrias-assad-claims-holocaust-was-a-lie-fabricated-to-justify-creation-of-israel/
[2] https://www.kurdistan24.net/en/story/33512-New-SDC-co-chairs-elected-in-northeast-Syria
[3] https://www.newarab.com/news/turkey-assassinates-prominent-syrian-kurdish-commander
[4] https://medyanews.net/kurdish-red-crescent-opens-first-oncology-hospital-in-northeast-syria/
[5] https://www.eurasiareview.com/21122023-will-washington-intervene-to-protect-the-kurds-of-syria-and-iraq-analysis/
[6] https://en.mehrnews.com/news/209795/Senior-Iranian-Turkish-diplomats-discuss-Syria-Palestine
[7] https://english.enabbaladi.net/archives/2023/12/us-congress-allocates-156-million-for-fighting-islamic-state-in-syria/
[8] https://en.mehrnews.com/news/209762/Iran-Syria-foreign-ministers-discuss-regional-developments
[9] https://syriadirect.org/education-in-afrins-line-of-contact-villages-hostage-to-unpredictable-shelling/
[10] https://syriadirect.org/education-in-afrins-line-of-contact-villages-hostage-to-unpredictable-shelling/
#سوریا
بینێرە لە ڕێگەی